നിയമസഭാ തെരഞ്ഞെടുപ്പിന് ദിവസങ്ങൾ മാത്രം ശേഷിക്കെ കണ്ണൂരിൽ വീണ്ടും അക്രമം. കതിരൂർ പാതിയാക്കുന്നിലെ ബിജെപി പ്രവർത്തക മജിഷയുടെ വീടിന് നേരെയാണ് ഞായറാഴ്ച രാത്രി ബോംബേറുണ്ടായത്. രാത്രി 8:50-ഓടെ ബൈക്കിലെത്തിയ രണ്ട് പേർ വീടിന് നേരെ സ്ഫോടകവസ്തു എറിയുകയായിരുന്നു.

സ്ഫോടന സമയത്ത് അക്രമികൾ വീട്ടുകാരെ അസഭ്യം പറയുകയും ഭീഷണിപ്പെടുത്തുകയും ചെയ്തതായി പരാതിയുണ്ട്. സ്ഫോടനത്തിൽ വീടിന്റെ മുൻഭാഗത്തിന് നാശനഷ്ടങ്ങൾ സംഭവിച്ചിട്ടുണ്ട്. കതിരൂർ പോലീസ് സംഭവസ്ഥലത്തെത്തി പ്രാഥമിക പരിശോധനകൾ നടത്തി കേസ് രജിസ്റ്റർ ചെയ്തു. ഫോറൻസിക് വിദഗ്ധർ സ്ഥലത്തെത്തി സ്ഫോടകവസ്തുവിന്റെ സ്വഭാവം പരിശോധിച്ചു വരികയാണ്.

ഏപ്രിൽ 9-ന് വോട്ടെടുപ്പ് നടക്കാനിരിക്കെ ഇത്തരം അക്രമസംഭവങ്ങൾ വോട്ടർമാരിൽ ആശങ്കയുണ്ടാക്കുന്നുണ്ട്. പ്രദേശത്ത് സമാധാനം ഉറപ്പാക്കാൻ പോലീസ് പട്രോളിംഗ് ശക്തമാക്കിയിരിക്കുകയാണ്.