മകളുടെ വിവാഹത്തിന് ബന്ധുക്കളെയും സുഹൃത്തുക്കളെയും ക്ഷണിക്കാനിറങ്ങിയ പിതാവ് അയൽവാസിയുടെ കിണറ്റിൽ വീണ് പരിക്കേറ്റു. മാതമംഗലം പേരൂലിലാണ് നാടിനെ പരിഭ്രാന്തിയിലാക്കിയ അപകടം നടന്നത്. പേരൂൽ സ്വദേശി കൃഷ്ണനാണ് (62) അപകടത്തിൽപ്പെട്ടത്. രാത്രി സമയത്ത് അയൽവീട്ടിൽ വിവാഹം ക്ഷണിക്കാനെത്തിയപ്പോൾ അബദ്ധത്തിൽ കിണറ്റിൽ വീഴുകയായിരുന്നു.
വീഴ്ചയുടെ ശബ്ദം കേട്ടെത്തിയ വീട്ടുകാരും നാട്ടുകാരും ഉടൻ തന്നെ വിവരം അഗ്നിശമന സേനയെ അറിയിച്ചു. പെരിങ്ങോം ഫയർ സ്റ്റേഷനിൽ നിന്നും അസിസ്റ്റന്റ് സ്റ്റേഷൻ ഓഫീസർ പി.വി. പവിത്രന്റെ നേതൃത്വത്തിലുള്ള സംഘമെത്തിയാണ് കൃഷ്ണനെ കിണറ്റിൽ നിന്നും പുറത്തെടുത്തത്. കിണറ്റിൽ വെള്ളം കുറവായതും ഫയർഫോഴ്സിന്റെ സമയോചിതമായ ഇടപെടലും വലിയ ദുരന്തം ഒഴിവാക്കി.
വീഴ്ചയിൽ സാരമായ പരിക്കേറ്റ കൃഷ്ണനെ ഉടൻ തന്നെ പരിയാരത്തെ കണ്ണൂർ ഗവൺമെന്റ് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. മകളുടെ വിവാഹ ആഘോഷങ്ങൾ നടക്കാനിരിക്കെ ഉണ്ടായ ഈ അപ്രതീക്ഷിത അപകടം കുടുംബത്തെയും നാട്ടുകാരെയും സങ്കടത്തിലാഴ്ത്തിയിരിക്കുകയാണ്. നിലവിൽ അദ്ദേഹം തീവ്രപരിചരണ വിഭാഗത്തിൽ ചികിത്സയിലാണ്.