ഇരിട്ടി: തിരഞ്ഞെടുപ്പ് സുതാര്യവും സുരക്ഷിതവുമാക്കുന്നതിന്റെ ഭാഗമായി പേരാവൂർ നിയോജകമണ്ഡലത്തിലെ വിവിധ പോളിങ് ബൂത്തുകളിൽ പരീക്ഷണാടിസ്ഥാനത്തിൽ ഡ്രോൺ നിരീക്ഷണം നടത്തി. അത്യാധുനിക സംവിധാനങ്ങൾ ഉപയോഗിച്ച് സുരക്ഷ ഉറപ്പാക്കാനാണ് തിരഞ്ഞെടുപ്പ് കമ്മിഷന്റെ നീക്കം.
പോളിങ് സ്റ്റേഷനുകളിലെ ജനത്തിരക്ക്, അക്രമസംഭവങ്ങൾ, പെരുമാറ്റച്ചട്ടലംഘനങ്ങൾ എന്നിവ ഡ്രോൺ വഴി തത്സമയം നിരീക്ഷിക്കാം. വോട്ടർമാരെ സ്വാധീനിക്കാൻ പണമോ മദ്യമോ വിതരണം ചെയ്യുന്നത് കണ്ടെത്തിയാൽ ഉടനടി നടപടി സ്വീകരിക്കും. സെൻസിറ്റീവ് മേഖലകളിൽ സുരക്ഷ ശക്തമാക്കാൻ ഇത് സഹായിക്കും.
ഡ്രോൺ ദൃശ്യങ്ങൾ ജില്ലാ തിരഞ്ഞെടുപ്പ് ഓഫീസറുടെ കൺട്രോൾറൂമിൽ നേരിട്ട് ലഭ്യമാക്കും. ഇരിട്ടി എസ്.എച്ച്.ഒ. സിജിത്ത്, എസ്.ഐ.മാരായ ജയദാസൻ, വി.പി. നിസാമുദ്ദീൻ, കിർലോർകർ എന്നിവരുടെ നേതൃത്വത്തിലാണ് പരിശോധന നടന്നത്.